Grunnhönnun RHnet byggir á IP samskiptastaðlinum yfir gigabit ethernet á ljósleiðrum. Rekstraröryggi er tryggt með því að hringtengja tengipunkta á höfuðborgarsvæðinu og á Akureyri og nota IP beiningaraðferðir til að beina umferð framhjá bilunum. RFC-3704 síun er notuð á tengingum sérhvers aðila að RHnet. Sjá álagsmerkt kort af RHnet til glöggvunar.
Höfuðstöðvar RHnet eru í Strulugötu 8 og þar tengist Háskóli Íslands á 10Gbs sambandi og aðrir aðilar á 1Gbs samböndum. Þar eru einnig tengdar flestar þjónustuvélar RHnet. Frá Sturlugötu er 10Gbs tenging í eldri höfuðstöðvar RHnet í Tæknigarði við Dunhaga. Þar er önnur tenging til Háskóla Íslands ásamt lághraða safnsamböndum þeirra sem tengjast RHnet um net annara þjónustuaðila (Símans, Vodafone og Fjarska). Frá Tæknigarði er 10Gbs tenging til RHnet tengipunkts á Skúlagötu 4. Þar tengjast Hafrannsóknastofnun og Listaháskóli Íslands. Þaðan liggur leið RHnet að tengipunkti við Grennsásveg þar sem Orkustofnun tengist, þaðan að Keldnaholti þar sem Nýsköpunarmiðstöð, Landbúnaðarháskóli Íslands og Matís ohf tengjast. Á Keldnaholti er einnig tenging við Hvanneyri og Bifröst. Frá Keldnaholti er tenging við tengipunkt í Ofanleiti þar sem Háskólinn í Reykjavik tengist, síðan að Bústaðavegi, þar sem Veðurstofa Íslands tengist (ásamt varasamböndum á vegum Fjarska). Síðan liggur leiðin að Hringbraut þar sem Landspítalinn - Háskólasjúkrarhús, Krabbameinsfélag Íslands og Háskólinn í Reykjavík tengast og þaðan er hringnum síðan lokað með 10Gbs tengingu í Sturlugötu aftur.
Hver RHnet tengipunktur er því tvítengdur og verði slit á ljósleiðurum er umferð ávallt beint eftir hringnum stystu virka leið með OSPF leiðstjórn. Í hverjum tengipunkti eru beinar sem taka við umferð tendra aðila á 10Gbs (Sturlugata, Tæknigarður, Skúlagata og Hringbraut) eða 1Gbs (allir) ethernet. Í hverjum tengipunkti má því tengja 6-10 aðila við RHnet án viðbótarbúnaðar.
Utan höfuðborgarsvæðis eru tengingar um ljósleiðara frá Orkuveitu Reykjavíkur til Hvanneyrar (þar sem Landbúnarðarháskóli Íslands er tengdur) og þaðan áfram til Bifrastar (þar sem Háskólinn á Bifröst er tengdur). Varasambönd eru um örbylgjukerfi Fjarska hf. Tenging til Akureyrar er um ljósleiðara yfir miðhálendið frá virkjunum Landsvirkjunar á Þjórsársvæði til Eyjafjarðar. Á Akureyri eru þrír tengipunktar hringtengdir. Ljósleiðari frá Reykjavík kemur inn í Dælustöð Tengis þar sem RHnet er með tengipunkt. Þaðan eru tengingar í punkt við Eyrarveg (þar sem Fjórðunssjúkrahúsið tengist) og í Sólborg (þar sem Háskólinn á Akureyri tengist). Tenging milli þessara tengipunkta lokar síðan hringnum á Akureyri.
Í höfuðstöðvum RHnet í Strulugötu er tenging RHnet við NORDUnet tengipunkt. Þessi tenging er 2x10Gbs og er stjórnað af tveimur Juniper MX240 beinum sem sjá um BGP samskipti við NORDUnet. Tengipunktur NORDUnet á Íslandi er tengdur umheiminum um 10Gbs STM-192 tengingu um DANICE til Danmerkur, STM-48 (2.5Gbs) á FARICE til London, og 4x1Gbs um GreenlandConnect til Halifax í Kanada.
Í Tæknigarði er Cisco 7206 beinir sem stjórnar 1Gbs tengingu við RIX (skiptipunkt innlendrar internet umferðar). Um það samband fara samskipti RHnet við innlendar netþjónustur.
Höfuðstöðvar RHnet við Sturlugötu hýsa einnig þjónustuvélar RHnet og Akamai vefspeglastæðu.